Ég heiti Elín Björk, dags daglega kölluð Elín, en hef síðan vorið 2005, samkvæmt tillögu frá ástkærri ömmu minni valið að nota Bjarkar-nafnið á myndirnar mínar. Ég hef alltaf haft gaman af því að mála og
teikna, blýantur var mitt uppáhalds tjáningarform framan af, eða
þar til ég kynntist olíunni fyrst fyrir alvöru í kring um 1992-3.
Annasemi og barnauppeldi tók þó yfirhöndina og málaði ég
einungis fáein verk að meðaltali á ári hverju þar til vorið
2005. Ég á það góðri vinkonu að þakka að ég dreif mig af stað
aftur, en hún mætti til mín með vatnsliti og vatnslitabók og sagði
mér að hefjast handa. Og nú er ég hér, öflugri en nokkru sinni fyrr og nýt
þess til fulls að mála vel flesta daga. Mitt uppáhaldsviðfangsefni
er konulíkaminn og mjúkar línur, sterkir glaðir litir og
tilfinningar. Með spaða eða pensil í hönd mála ég það sem
andinn blæs mér í brjóst hverju sinni, hvort sem það eru
fyrirfram mótaðar hugmyndir í höfðinu eða myndir sem ég sé
inni í striganum. Olían er mitt uppáhald en mér finnst gaman að
spreyta mig á nýjungum, acrýl, vatnslitum, pastel....... Hingað til hef ég verið hógvær og ekki borið
verkin mín á torg, en með hækkandi aldri og aukinni reynslu hef ég
lært að maður skyldi ætíð lifa sína drauma, framkvæma þá og
sjá þá verða að veruleika. Hér með er minn draumur kominn á
daginn, ég er að lifa hann. ;) |
© elin bjork gudbrandsdottir |